商業社會 就係講搵錢同駛錢 邊有話cheap唔cheap 市唔市儈？王晶嘅專長就係sell戲同賺錢。點解邱禮濤r唔到大贊助 但王晶可以？呢啲就係王晶嘅本事。點解邱禮濤十日拍套戲票房慘淡 王晶十日拍套戲票房好好？呢啲又係王晶嘅本事。
評論王晶，唔可以單憑佢嘅政治立場 而全盤否定佢。佢嘅橋 不嬲出色 佢嘅戲 其實好多都好好睇。你點可以話佢專門拍爛片？
劉德華為還債拍超多爛片 黃秋生為賺錢拍超多爛片。爛片唔一定代表係垃圾 可能只係低成本製作 卡司弱 宣傳少。
王晶嘅好 在於佢肯關照電影人 糧高 準時出 從不拖糧。咁嘅老細邊度搵？鄭伊健撈電視唔出彩 王晶一手捧紅佢；舒淇做19 model，王晶帶佢過嚟香港發展；張家輝拍戲拍到抑鬱 王晶同佢講 嚟啦 有賭未為輸 開戲一定預埋佢。
當家陣嘅人 喺度彈 王晶又拍爛片。
不如諗下 爛片其實仲有一個好處 就係養活電影人。
有乜嘢慘得過冇戲拍？爛片有好多原因造成 唔係單純兩個字總結 可能題材唔啱市場 可能劇本寫得太抽象 可能⋯好多可能wor，但有人願意長期拍電影 關照同行
王晶呢啲好老細 邊度搵？
有時候 精英盡出 並不代表套戲就擔定凳仔等攞獎。「等著你回來」就係其中一套精英盡出 往後乏人問津嘅電影。
導演張子亮、編劇李志毅、編劇杜國威、導演陳可辛 四強人合作。攝影黃岳泰 配樂林敏怡 演員梁朝偉 吳君如 吳倩蓮……
本來想講訓喺度都贏 等慶功啦。結果呢套鬼片雖然幾有創意，但整體水準並不高,唔少部分講唔通，是導演講嘅嘢太深 定佢哋唔知有bug？令成套戲大打折扣?
講起吳倩蓮 唔駛睇「恐怖雞」，睇「等著你回來」更加了解呢個演員，真係純粹用演技取勝，尤其一人分飾兩角，佢做完正常人再做黐黐哋線嘅鬼，都非常好。
本片有幾個shot 幾個take 吳倩蓮單單眼神都相當嚇人 。
成套「等著你回來」 睇完 詫異點解冇人搵佢拍啲傳統鬼片，我諗李心潔會俾吳倩蓮完勝。
有人話 劉德華當年欠債之下 乜片都拍 於是拍落一批爛片。小弟走去望下，發覺都唔算好爛。因為喺千禧年 單單一年時間內 黃秋生可以有23套電影上映 大部分都擔任主角。而睇返呢批電影，黃秋生近乎等收工嘅演技 堪稱一絕。
香港電影界本來已經俾老翻摧毀 千禧年前後 經歷完金融風暴 老翻都做唔落去。好多演員都惡撈。
所以兩屆金像獎影帝、性格演員 黃秋生 拍落好多低成本製作。
呢類戲 黃秋生多數拍幾日咋 一日幾皮嘢 拍完收工。
可能呢期撞正黃秋生身體唔好，所以佢喺呢批電影入面嘅演出，毫無亮點，等收工系列。甚至表情起伏都冇乜。
而市道艱難 反而仲有一批人死心不息 諗住製作電影。於是呢期都好多低成本製作。有身份證就可以開戲嘅情況之下，為香港電影界帶來一批holly shit嘅作品。留意返 90年代80年代 好多低成本製作都唔錯，但千禧年打後，好多低成本製作嘅質素非常差。
好似呢套「女飛虎」咁 ，我可以睇得曬唔skip 但故事過於空洞，臨尾搵吳家麗扮下飛虎 就想製作當年霸王花系列嘅氣勢？
而我cut呢段片，兩個警察就想玩調虎離山之計救人質 笑死我
1：黃秋生呢頭講完電話 好快就鬼一般攝入 然後話過去睇睇（睇咩？一早call飛虎嚟啦）
2：黃子揚殺兩個叛徒 但最後竟然射林彬雙手only 唔殺佢 再等警察救走……（呢度已經夠曬搞笑 殺兩個 最關鍵個個唔殺）
3：黃秋生一人引開班黑幫爛仔 場面搞笑。
4：最後順利救到人質 飛虎先出嚟。
比起黃秋生嘅hea 黃子揚似乎仲想力挽狂瀾 可惜故事本來已經唔多掂 加上佢同黃秋生都用其他人嘅配音，效果大打折扣……
喺98-03年，逆市之下，香港反而年年有數百部電影上映，大多數為票房仆直嘅電影，最誇張，幾百蚊票房都有。
其實每一間戲院會揀戲，例如呢間播開大熱作品，點會俾啲不知名低成本製作進駐？就算俾機會，都要睇宣傳，否則分分鐘俾1-2場就算數。有啲索性1場都唔俾踢你走。戲院揀戲播，從來都係商業考慮，條片有價值，就大把戲院爭住播啦，如果低成本製作，當然冇咁多戲院上映，或者只能揀啲唔好嘅時段，快閃場。
咁啲老細仲唔追斬導演？票房幾千幾萬嘅導演仲唔駛著草?
香港票房其實唔算啲咩。因為通常會製成VCD/DVD內銷返大陸 外銷出國。海外華人一見到有港產片，思鄉情懷就大爆發，海外嘅市場其實真係唔會太差。所以我哋周不時見到某啲明星會參演一啲超級低成本製作嘅電影，啲老細正正貪明星嘅名氣，可以幫佢sell到海外市場。
當我哋笑TVB某啲劇集收視唔好嘅時候，其實TVB本身好淡定。佢既可以內銷返大陸 又可以喺馬拉 新加坡 等東南亞市場大賣，又可以喺美加 澳洲 英國嘅地方大賣。總之呢個世界咁多華人，佢TVB劇集根本唔會蝕。
「童黨2001」其實就屬於低成本製作當中 唔錯嘅選擇。故事講一班染上不良嗜好嘅年輕人，最終因為吸毒運毒而改變一生。
演員宋本中演技不俗，有佢喺度，成套戲真係加分唔少。加上柯受良嘅坐鎮，成套戲並不難睇，某啲位仲可以帶出唔錯嘅信息，勸年輕人唔好誤入歧途。
票房8150？其實只不過是數字，好多800萬嘅戲都未必好睇過「童黨2001」！「童黨2001」嘅敗筆在於畫面太差、剪接唔多掂。故事其實唔錯。
全片：
言論自由，唔代表講乜都得寫乜都得。正如ISIS恐怖式行刑會喺Facebook上被封殺，正如好多殺人討論會被封殺。言論自由嘅基礎建立喺道德標準之上，並非打著言論自由嘅旗號，發佈一啲危害社會 危害別人安全嘅信息，可以為所欲為。
創作自由嘅基礎同樣建立喺道德標準之上。人若失去了道德底線，就會變成禽獸。
如何改編慘案？基於慘案嘅真相，嚟做一個總結和反思。而唔係亂改受害人和兇手嘅關係，明明索K叫雞 ，High大咗殺人肢解，俾翁子光一改，好似死者同兇手有感情，死者表露想死嘅願望，兇手因為對佢有好感而成全對方。
WTF……喺我嘅未來，我除咗會提醒各位創作人唔好走火入魔，亦會無限期祝福 翁子光 他朝君體也相同。當佢或者佢親友慘遭殺害嘅時候，會有人執導下一套踏血尋梅。
對於呢類喪心病狂嘅導演，金像獎竟然頒獎俾佢，可見呢個電影圈幾咁恐怖。
做人嘅 冇同理心，你就會覺得我Why so Serious。改編兇案，必須要拿捏到分寸。翁子光擺明為咗宣傳，連名字 案例都跟足返援交少女肢解案嚟拍。擺明消費死者，借轟動全城嘅case嚟創作，呃likes。
明明少女慘死，兇手索K叫雞殺人。寫到踏血尋梅咁，簡直禽獸所為。
同樣 當年邱禮濤執導嘅「八仙飯店之人肉叉燒包」，就係禽獸大電影，真相根本冇人知，兇手臨死前都話自己冇殺人。邱禮濤就屈人殺人不特止，仲話佢肢解死者製成叉燒包。全片出現多次強姦嘅鏡頭。喪盡天良。
創作嘅道德淪亡，正正係由邱禮濤同翁子光發揚光大。然後成班影評人話正呀，金像獎話好戲呀。
都係嗰句啦 他朝君體也相同。
PS：成個電影圈 得我會出文炮轟佢 你睇翁子光 幾寸。所以我咪話他朝君體也相同。只有最親嘅人被人擺上台嘅時候，呢一種切膚之痛，禽獸先會明。我哋人嚟，人先會有同理心。先會出文炮轟啲禽獸。
電影世界，根本就係一個大嘅賭場，演員，根本就係一班賭徒。正所謂「唔賭唔知時運高 唔拍唔知票房好。」 80-90年代 港產片盛世 一年起碼都幾百套電影上映 就算上映場次極少甚至冇得上映 輸出外地嘅VCD都多到嚇人。好多電影 好多演員 根本就冇人認識。
每年有咁多戲開拍 自然需要新血 新演員。於是好多妹妹仔發下明星夢 或者睇下可唔可以拍套戲釣到金龜婿 再唔係賺少少錢都好呀 毅然選擇入行。
情況等同千禧年後 咁多女仔做援交 一個道理咋嘛。都係數學題，青春擺喺度唔代表永恆，喺有限嘅青春內搵更多嘅著數和機會，就係醒目女。
拍三級片 有成功嘅例子 啲妹妹仔咪更加雀躍想試 大家望住葉玉卿 葉子楣好似撈得好掂 咦 有得博下wor。
但人嘅際遇就係咁得意，有幾多個拍三級片可以拍到變舒淇 李麗珍？
如果鄭浩南當年唔好掛住溝女 mark哥嘅角色就係佢做嘅 你話啦 佢家陣分分鐘影帝寶座都拎唔少啦 仲走去拍三級片 半紅不黑？
李唯君被某啲寫鱔稿嘅人譽為「翻版鐘楚紅」，拍咗四套炮灰級電影之後銷聲匿跡。我睇過佢四套戲，呢套「烹夫」算係佢「代表作」。
演技就唔算好差 勝在對白盞鬼 加上有一部女權主義上身 要老公幫佢奶腳趾 都幾好笑。
三級片演員，通常有兩種。第一種，本來有啲名氣，為咗片酬or劇本，搏一鋪露兩點；第二種，冇乜人識，想靠三級片翻身。
好似舒淇咁，拍三級片可以撞到爾東陞，不能說不是一個黃金機會。結果舒淇拍完「色情男女」，就唔需要再拍三級片，慢慢轉型為實力派女演員。
我諗男人都睇唔少三級片，要開group分享三級片，講三日三夜都講唔曬，今日想同大家講下李月仙。
我欣賞佢夠搏，冇包袱，一心想喺娛樂圈紅。佢以素人嘅身份走去見成人雜誌嘅老細，李月仙話錢唔緊要，露三點都冇問題，最緊要有封面。
而本來諗住做model，封面拍唔到，反而被推介去拍三級片。李月仙豪爽應承。
我認為一個女仔，如果可以好似李月仙咁型，冇乜邊幾個。不為錢，不為追明星，只為紅。難得有青春，點解唔博下？
而事實上，李月仙拍咗幾套三級片，演技都唔算差，三級片嘅世界入面，炮灰太多，而好多炮灰啲戲真係屎，以為剝曬衫咁做叫下呻吟下就ok，好似李月仙咁，雖然佢拍親都低成本製作，但佢交足功課，有啲劇情就算幾變態下,佢都可以傾情演出。
呢套由台灣「小黑」柯受良執導、梁朝偉主演嘅「正牌韋小寶之奉旨溝女 」，李月仙亦參演一角。
佢雖然唔算好靚，但佢拍嘅三級片我追曬，我真心覺得如果佢可以遇到其他名導演，佢可以有更上一層樓嘅表現。
舊的港產片新的影評 