點解我成日讚亞視，因為亞視係嗰啲窮到喊 資源嚴重缺乏嘅電視台，但往往喺絕境之下拍出好嘅劇集，除咗製作人員勁之外，仲要靠啲演員抵得諗。好多亞視演員為咗拍好套劇，人工少都，仲要挨到不似人形，用最少嘅資源貢獻出最盡嘅光芒，完全為創作訓身。能夠喺亞視挨過嘅台前幕後，都是精英嚟，唔單止有才華，仲要好識得諗，敢於為藝術犧牲。
亞視製作雖然簡陋，但其音樂方面絕不揸流攤，大部分亞視劇集嘅背景音樂和主題曲都相當高水準。亦為劇集增色不少。
半紅不黑嘅甄子丹 亦曾喺亞視留低過代表作。如果呢套劇由無線執著，相信甄子丹唔駛等多十幾年先憑「葉問」爆紅。
我諗1979嘅300蚊應該等於家陣嘅10000蚊，而當年嘅10000蚊相當於今日嘅300000蚊。而事實上，蝦叔嘅演技的確有層次得多，老夫少妻見到老婆勾佬，怒不可遏，卻有心無力，最後默認呢段荒謬嘅三角戀。
任達華首次擔正電影男主角，勇氣可嘉，喺70年代末拍三級片 仲要飾演打野戰 殺人 略帶變態佬氣質嘅角色，完全冇諗過拍完呢套劇以後入唔入得返TVB or亞視，亦冇諗過街坊觀眾會唔會戴有色眼鏡睇佢，我認為華哥真係好搏命
「你係永遠屬於我嘅」相信如果寫成歌曲，必定會引起樂壇嘅震蕩。呢啲係控制慾極強、妒忌心極重嘅一種病態戀愛觀念。任達華可以同以前拍過三級片嘅歐瑞偉可以組成三級Boy’z合唱呢一首歌曲，當年歐瑞偉喺「我來自北京」當中亦曾經飾演類似嘅角色，金句為：「我入過嘅窿永遠屬於我。」（我記得類似咁嘅對白）
「慾火焚琴」係一套講報應嘅故事，最後任達華殺死蝦叔，女主角疑神疑鬼殺死任達華被捕，呢一間大宅落入女工人陳立品手足，看看佢鬼馬嘅吹雞，可見能夠笑到最後嘅依然係良心未泯嘅人。
如果【法網群英】喺TVB播，我肯定可以成為全城熱話，可惜當年喺亞視播，註定佢成為滄海遺珠。但滄海遺珠唔一定係壞事，因為係好嘢始終會俾大家發掘返。搶一刻熱話呃一時收視，都係過眼雲煙，因為如果套戲唔掂，人哋睇一次已經唔會再想睇。
.
若干年後沒有人會記得那些股票、黃金、錢財，世界大事都只是過眼煙雲，但一個好嘅劇本，過咗五十年、一百年，依然有人欣賞，呢啲就叫做文章有價。
同樣道理，戲劇有價，好嘅戲劇，唔需要爭一朝之長短。係好嘅，過咗幾多年後都依然會有人讚賞。
呂頌賢塑造咗最經典嘅令狐沖。瀟灑不羈，不被框框所馴服。角色性格太令人難忘，以至於佢著住時裝做臥底殺害上司，都令我覺得佢係令狐沖：「咦，令狐沖做壞事！」
暗黑令狐沖，雖然亦有重情義嘅一面，但同樣心狠手辣，殺上司，殺善良女同事，殺前度女友……呢套【法網群英】本身已經甚有睇頭，加上有暗黑令狐沖，真係唔追唔得。
【法網群英】全套35集：
http://list.youku.com/albumlist/show?id=18085134&ascending=1&page=1
法網群英 #呂頌賢
「娛樂圈四大惡人」，坦白講，得何家駒長期「惡到底」，但何家駒參演嘅角色，大多數屬於人渣級，已經唔單止係惡人，而係上升到可以同黃秋生任達華三足鼎立嘅變態。黃光亮嘅惡人代表作，大家應該好記得「天若有情」入面嘅喇叭，但盡覽黃光亮參演嘅電影，大多數係帶有喜劇色彩得個惡樣嘅角色。李兆基，就直頭係黑社會入面嘅「吳孟達」，有佢做嘅戲份，大多數都係帶有喜劇色彩。而最後一個亦最出名嘅大傻哥成奎安，亦漸漸變成喜劇界嘅寵兒，專門搵佢做一啲智商唔高嘅黑社會大佬。反而大佬B吳志雄，都好過李兆基，起碼有喺「古惑仔3」同「江湖大風暴」等電影入面做大奸角，並非一味得個惡樣。
分類嚟講，港產片四大變態佬，黃秋生任達華何家駒走唔甩，最後一個加個吳毅將都唔過份；港產片四大斯文敗類，譚耀文李子雄吳啟華鄭浩南毫無疑問。
而港產片四大惡人，必須要長期做令人咬牙切齒嘅奸角，就算唔奸，都肯定要沙塵白霍，喜怒無常。
何謂「沙塵百霍」？趾高氣揚、不可一世、輕佻浮躁、揮霍無度……有齊呢四樣就係「沙塵百霍」，同埋我讀Grammar 架，廣東話俗語我好熟悉。
嚟 同大家介紹下「娛樂圈四大惡人」，黃子揚我介紹過，吳毅將身兼變態佬同惡人兩大範疇可謂演技犀飛利，第三個就係最紅嘅張耀揚，我唔多講。今日要介紹嘅就係林國斌。
斷手流大師兄，你估佢唔拍喜劇會點？
咪兇到你暈，氣場勁到喊。
呢啲咁出色嘅演員，無論過咗幾多年，你都會咁欣賞佢。
黃子揚下巴朝天目中無人，你睇下林國斌嘅眼神，一啖就像是噬咗你。睇曬呢十幾分鐘，你就會明白我點解我質疑 「娛樂圈四大惡人」。你話惡呀嘛，惡型惡相乃先天之優勢，但霸氣同磁場，有冇辦法keep住咁犀飛利，就見仁見智。
大家好好欣賞下片段，分別由五套電影片段剪接而成:「醉生夢死灣仔之虎」「黑獄斷腸歌」「龍虎缽蘭街」「中華賭俠」「雷霆掃穴」。
命水認真最緊要。喺TVB劇集「學警狙擊」爆紅，配角變成Icon，Laughing哥熱潮席捲全城。食住上，群星拱照，拍套電影。點知主角反而失色，配角應聲彈出。
Laughing 哥就好似一匹原本跑緊二班賽嘅馬，爆冷奪冠，如今轉戰一班賽，卻俾兩大老馬黃秋生同吳鎮宇搶盡先機，一放到底。
黃秋生喺呢套臥底電視電影當中，先做警察，再做臥底，然後棄警從黑，做一個真真正正嘅大佬。內心戲複雜到，拍多套「一哥前傳」都得。影帝黃交足功課，但最精彩反而係吳鎮宇。
錫妹如命，痛恨古惑仔埋細妹身，最後為咗嗰妹幫Laughing 著草，命都冇埋。
電視電影，我哋睇得多，唔鬧到佢上天花板都肯定割凳洩憤。但呢套嘢整體合格，又彈出黃秋生同吳鎮宇呢啲出位嘅角色，所以咪值得一睇。
可惜主角 Laughing 哥，明顯被搶曬風頭，未能喺聲勢上更上一層樓。
之後喺電視劇 「潛行狙擊」當中食埋Laughing哥最後一水，表現生猛曬，但熱潮已過。
緊接住兩套「 狙擊」「法網狙擊」 「神鎗狙擊」，連Laughing哥嘅名都冇埋。
可見「Laughing 哥」已成為集體回憶，不需要佢再出嚟「 狙擊」。
近年謝天華做返「大天二」，跟住鄭伊健等人做「古惑佬」，周圍開演唱會。
呢個故事話俾大家聽，曾經hit過，但之後再無代表作，食老本食唔到一世。現實殘酷，花無百日紅。
只有堅持做落去，隨時博返一次滿堂紅。
全片：
我成日都講，演員同電影有兩種常見嘅關係，，一係套戲本身質素高所以提升到某啲演員(你可以理解為提攜咗嗰演員），一係演員本身質素高救到嗰爛劇本/爛戲。有時候有啲戲根本唔好睇，好似「伊波拉病毒」咁，若非黃秋生救駕，套戲會俾人鬧到至今，點可能反底成為經典？
有啲演員 最擅長救爛劇本 可以將啲粗製濫造嘅電影 起死回生。黃子揚就係屬於呢一種。我次次見到黃子揚呢啲演員都會慨歎，點解佢做唔到影帝?點解佢拎唔到金像獎？
點解「槍火」「無間道」「黑社會」呢類製作冇佢份。
見親佢拍嘅電影，一係導演廢，一係老細窮。所以咁出色嘅演員，成就只限於 俾人記得佢嘅名 知道佢做爛仔好正，僅此而已。
「最危險人物」，呢條MV+預告片分分鐘好睇過成套戲，當然黃子揚單拖撐起成套戲，以至於成套戲都未至於話爛。
任達華演過葉繼歡，陳華演過葉繼歡，任賢齊演過葉繼歡，我認為黃子揚演葉繼歡演得最好。
香港人好熟悉包青天，有賴亞視無線爭住一齊播嘅包青天劇集成為城中熱話，而套包青天來自台灣,係中華電視公司八點檔連續劇，包青天嘅飾演者為台灣演員金超群，亞視配音為譚炳文。
無線後來又自己整套新版，搵狄龍做包青天、黃日華做展昭。邊套好睇邊套唔得，心照啦。
若干年後，狄龍仔又整套包青天，好唔好睇，我唔知，但我棄咗。
如果有人鐘意睇包青天 crossover 柯南金田一，呢套少年包青天就不得不睇。
當年無線購得版權，喺香港播放過架。
「少年包青天」抄襲柯南同金田一嘅劇情，佢抄得嚟剪接得好，令人睇得好順好投入。男主角周杰，犀飛利，當年拍完「還珠格格」，憑爾康一角爆紅，而喺「少年包青天」入面，周杰嘅演出四平八穩，交足功課。比之後第二第三續集更加令人讚歎。
講起抄襲不得不提我和殭屍有個約會，編劇陳十三將動畫+漫畫+電玩嘅橋段和場景，抄曬落去,堪稱抄襲界經典作品。
所以我哋批評抄襲嘅同時，亦要肯定一樣嘢：有啲作品抄得嚟更上一層樓，有啲作品抄得嚟非但原地踏步 甚至倒退。
PS：呢首國語主題曲，我覺得幾好聽 好似毒男暗戀女神咁樣：「你的一舉一動 我卻倍加留心……」好附和我作為毒男界嘅心聲。
「影壇龍心」劍術刺激高潮，睇龍心舞劍High爆？
無論爛片&冷門戲，我都盡量搶救，發掘下有冇啲不為人知嘅亮點。就好似人咁，有啲人樣衰，可能佢耳仔好靚呢，可能佢煮嘢好叻，煮嘢嘅神態好Charm呢。好似我咁，年少輕狂，狂到甩頭髮，27歲成個阿叔咁款，但我寫嘢好睇呢，同埋我講嘢好好笑呢，或者都幫我挽回唔少分數嘅，right？
唔急於判一套戲死刑，正是舊的港產片新的影評嘅宗旨。
不過有啲導演，真係令人歎為觀止。陳奧圖，執導嘅 「陽光地獄之人肉市場 」，絕對唔屬於滄海遺珠，但又未至於死刑wor，套戲有幾幕真係好好笑。
例如搵件好似龍心嘅演員 +唔錯嘅鬼妹，點知播音樂弄刀劍，條鬼妹High到好似鬼上身咁。
我當陳奧圖想製造文藝片嘅氛圍，但唔係諗住搵咁嘅演員， 就可以做到爾冬陞作品「色情男女」入面張國榮同舒淇嘅感覺下嘛？
你睇下影壇龍心，啲戲仲衰過真龍心，明明條鬼妹都幾索，咁咪順住三級片路線去馬囉，阿陳先生冇啦啦轉去夜市車景，下一幕就係鬼佬用雪茄口爆大陸仔。
呢套戲雖然有陳國邦 楊玉梅落力演出，但劇本同選角堪稱災難性，勝在有啲位就係幾搞笑，古語有云，項莊弄劍，意在沛公。今均真係，龍心弄劍，鬼妹撞邪。
喺「喜劇之王」入面飾演躁狂導演、喺叱咤頒獎典禮上扮四大天王。李思捷嘅才華。初為人所知。
電視劇 電影，佢拍唔少，但我唔鐘意李思捷，並非因為佢私底下嘅形象，而係佢成日做一啲角色，好似好醒目嗰類，而佢嘅演繹令人覺得，好over，懶醒。
如果劇情需要一個爛醒嘅人然後犯錯呀闖下大禍，我覺得ok，但好多時候劇情唔需要，但佢演繹嘅效果，俾我覺得佢好chok(不是靚仔）好特登。
演戲，自然就最好，唔少演員，與其話佢好好戲 不如話佢自然恰當。今次李思捷真係做到嗰一種自然」恰如其分。俾人覺得你，做出嚟嘅效果，好多時候就有反效果。觀眾鐘意演員入戲，鐘意演員真係咁嘅狀態，並不是鐘意佢「做」出嚟嘅效果。
李思捷一直嘅演繹方式，都俾我覺得佢「做」出嚟嘅感覺，有時候仲要幾做作。
李思捷，近年主持「玩嘢王」同「今晚睇李」前者勉強ok，後者堪稱災難性。
估唔到 2019 佢喺「她她她的少女時代」飾演一名過氣歌手、隱姓埋名廢廢哋嘅中年。竟然意外哋出色，每一個感動位，佢都做得好好。
講真，比起阿田，我更多因為睇李思捷先睇呢套嘢。李思捷嘅角色好立體 好正。廢中有叻 柒中有型 年少輕狂 中年有情。
見到佢 我甚至起我親生老豆 以前風花雪月唔理屋企 踏入中年開始有所轉變 成功同我做返朋友嘅關係，我覺得咁多年失去父愛 喺呢個時候仲可以得返少少父愛，感恩。遲來的父愛 淡淡的父愛 好過從來都沒有俾過我呀。
余文樂同陳冠希並無可比性 一個係娛樂圈路人 一個係天生Star。Star 唔單止靚仔 仲要有星味。我相信冇人會質疑謝霆鋒星味十足，80年代出生嘅香港藝人，謝霆鋒好大機會就係少數仲有星味嘅藝人。
星味 好吸引到普通人。普通人把口就毒 但見到明星 就會變成小fans。就算謝霆鋒喺網上俾幾多人恥笑 詬病 辱罵 佢出現喺現實中 好多人都會變成小fans 見到佢會開心 希望合照。
我成日話謝霆鋒做戲太chok over曬而不自知。做咁多戲 得「十月圍城」入面嘅車夫做得最好。完全擺低偶像包袱 偶像形象 專心做好一個車夫。
但我哋一廂情願認為 啊明星點點點 你應該好似周潤發咁 好似張國榮咁 好似梁朝偉咁 有星味得嚟唔好點點點 要點點點。
要求一個咁有星味嘅謝霆鋒 放棄chok 然後個個角色都好似「十月圍城」咁 進入角色 唔好俾人知道其實你就係謝霆鋒？
我諗好多老細都會拍爛檯 我請你謝霆鋒返嚟就係要你chok 你同我做到唔似謝霆鋒？老細就係要你膚淺 同我玩深度？
謝霆鋒嘅情況 可以拎劉德華出嚟講。劉德華以前做親戲 都話俾人 佢係劉德華「Hello 我係劉德華」。佢啲戲 佢啲fans入場都起碼佔咗一半票房 老細梗係同佢講「繼續劉德華 劉德華就係你搵錢嘅基本要求。」
一旦劉德華唔似劉德華 後果不堪設想。幾多戲就係特登造就一個唔同型態嘅靚仔劉德華出嚟 昆fans入場支持劉德華 你搞到唔似劉德華 點同老細交待？
當我哋呢啲凡夫俗子 喺度要求明星應該點點點嘅時候 或者根本唔清楚商業社會嘅運作 老細就係要造謝霆鋒 chur到盡佢嘅星味 唔chok 唔over 點賺錢？
細細嗰就出嚟搵食 謝霆鋒唔會唔明白 佢嘅價值喺邊度。
商業社會 好多運作 並不是我哋凡夫俗子能夠熟悉嘅。
舊的港產片新的影評 