70年代末嘅任達華，已經係具知名度嘅配角演員。而任達華開始涉獵電影，第一套擔正做男主角嘅電影「慾火焚琴」，已經話俾你聽，呢位仁兄搏到盡。

關海山嘅片酬日薪為萬零蚊，任達華300蚊。而呢套「慾火焚琴」，劇集老土，粗製濫造，幸得兩位好演員嘅演出，為呢套戲生色不少。

80年代初，床上戲+露點已經好大膽，仲要打野戰。我佩服任達華嘅勇氣，咁都夠膽試，仲要做得唔錯。

有一幕佢同女主角打野戰，野戰後，佢唔知拎到定利器出嚟，喺女主角手臂劃破血，咬牙切齒講：

「你屬於我一個人，你係我嘅人！」

對白類似咁啦，齋睇文字都知條友喪喪地。

講起飾演變態佬，不得不提黃秋生。黃秋生同人簽咗合約，拍三級片，拍囉。拍變態片，拍囉。拍完，投資方話唔夠激wor，要強姦同筷子插下體，黃秋生同佢講，唔合邏輯呀嘛，但冇辦法，繼續拍。帶住仇恨和絕望，黃秋生拍出嘅鏡頭連攝影師都話：「秋生，實在太恐怖啦！」一個演員因為窮被迫拍一啲變態片，結果做埋影帝，都咪話唔諷刺。

而事實上，任達華飾演變態佬嘅次數仲多過黃秋生。

任達華：慾火焚琴、擋不住的瘋情、羔羊醫生、天水圍夜與霧、烏鼠機密檔案

黃秋生：叉燒包、伊波拉病毒、虐之戀、盲女72小時、失眠。

而任達華飾演葉繼歡，同樣帶有精神病嘅狀況。可見任達華真係「好迷戀」變態佬元素。重點提提大家，黃秋生做變態佬實在是身不由己，而任達華第一套擔任男主角就做變態佬，難度同勇氣高過黃秋生好多。真係好堅！

慾火焚琴

我個人唔鐘意講啲自己做唔到嘅嘢，例如n年前好多人罷看TVB，然後如今卻歸位追看。當然都有少數人真係keep到不追不聞不議TVB，本人對呢群有骨氣嘅人表示讚賞。

說話有時候唔講得太盡，我嘅宗旨，好睇就追下，我理得佢乜台，除非佢直播殺人全家，否則政治立場唔足以令我封殺佢。

一如我所料，TVB嘅「職業劇」通常都好on dog。

男主角通常與世無爭，專注事業，然後肯定會因為某啲事情同奸角對決，編劇描寫某職業嘅時候，做功課唔夠，所以會寫唔少失實 甚至離地嘅劇情。最後冇貨賣，就寫邊個邊個之間嘅曖昧 感情 上下床咁囉。

「白色強人」，又是同一條方程式。唐明與世無爭,醫術高明，專注救人。然後又冇啦啦 從神人變成凡人 想追返前妻 加入醫院紛爭.

而蔣志光琴晚show英文 大講專業。

劇中唔少劇情都離地。最新一期是醫生鬥快做完手術，搵初哥第一次處理高難度手術,仲要破紀錄極速完成。

當病人好似白老鼠咁

呢套劇最失敗在於 觀眾都覺得佢哋做緊戲 而冇人信眼前呢班人真係醫生。因為真嘅醫生真係唔咁離地。

至於我點解話適合網上skip睇。大佬呀 套嘢咁不堪 何必硬食直播時嘅廣告。套戲好嘅話都話幫手睇廣告。

唔好，就唔需要睇直播，加上直播唔可以skip住睇。追開呢個page都知我推崇「skip住睇」，對於一啲冇乜創意誠意嘅劇集，唔好犧牲自己太多青春。

白色強人

相信自己嘅感覺，就係我睇電影嘅宗旨。部分人睇王家衛嘅電影可以睇到好感觸，長篇大論。但我唔睇，我連佢拍葉問都冇睇過。我連啲爛到喊嘅電影都可以睇幾次，但王家衛啲知名電影我竟然冇睇過。

一：我未上岸。我唔認為我有興趣有耐心去睇啲被譽為好藝術嘅電影。如果星期四六合彩頭獎有我份，我可能先會進入到王家衛嘅世界。

二：窮鬼幫襯低成本製作。有一種好自然嘅傾向，我唔鐘意追荷里活大製作，我鐘意發掘啲舊港產片嚟睇。

「天水圍的日與夜」，我就好鐘意睇，我鐘意佢自然，舒服。啲對白平凡不做作，故事平凡不做作。戲嘅最高境界，令人唔覺得睇緊戲，栩栩如生，就好似眼前發生嘅事情。

有啲劇集，明明做醫生，啲對白鬼死咁押韻咁出位，有咁chok得咁chok，做手術好似赤壁之戰咁出場。可能好多觀眾鐘意呢啲，醫院好悶，唔加嘢唔好睇。

相信自己嘅感覺，你冇錯，我冇錯，佢冇錯。正如我咁完全black list王家衛三個字，我冇錯。你話呢套「天水圍的日與夜」悶，你冇錯。

睇戲，唔駛理會其他人，相信自己嘅感覺。同埋有啲戲睇唔明，唔需要夾硬搵答案，可能個個導演都冇答案。

天水圍的日與夜

TVB劇總比人一種感覺，唔真實，假，做出嚟。點解？因為TVB咁多年嚟，喺試鏡 選角 方面 都犯下不可饒恕嘅錯誤。佢哋真係唔會改，唔會反思，近年嘅校園劇啲學生一樣咁老積。

阿哥，唔係年紀細就一定啱做學生角色。氣質唔似呀嘛，有邊個真嘅學生，未出嚟社會做嘢已經被社會污染到唔清唔楚？我夠膽講，全香港最Band5 嘅Band3學校，都搵唔到好似TVB搵嘅學生咁 江湖味 風塵味濃郁。

「青出於藍」呢套劇，好睇在於，班演員做得好，故事寫得唔錯。但無論學生定阿sir 都根本唔似學生 阿sir。睇返資料，當年呢班學生嘅年齡其實都唔大，不過大多數20幾歲。

讀中學 我當你讀到中六 你頂盡咪18歲 大佬 成班演員20幾歲，已經被社會污染入骨。根本就冇學生獨有嘅氣質。

尤其粱烈唯 一早已經做電影男主角，人哋做古惑仔做到監躉，樣唔老 唔代表佢適合做學生。

周永恆當年拍呢套劇 19歲，問題係，佢似10歲已經冇讀書呀嘛，喺社會碌咗9年幾，點會似學生？

21歲嘅趙頌茹，嗰樣已經被社會污染咗，加上TVB嘅化妝，邊度似學生？

嚴格嚟講，陶大宇一啲都唔似阿sir若非佢演技唔錯，真係令人睇到好尷尬。

而郭可盈同歐陽震華，就真係有啲符合miss同校長嘅氣質。

所以「青出於藍」雖然拍得唔錯，奈何選角實在太離地，我不禁陷入對白幻想，好似一班古惑仔同班啤酒妹坐喺課室度：

古惑仔：「今晚我哋要冧大佬B。」

啤酒妹：「先生不如開打青島B賀定先？」

而TVB呢十幾年繼續都推啲等上位嘅演員做學生，例如江嘉敏，又話女神，嗰樣俾社會污染到咁，氣質根本就大人嚟，點P圖都搵唔返學生嘅味道啦阿哥。你當我盲咗咩？

反觀VIUTV，你睇下人哋搵嘅演員，做學生係咪好match先？28歲嘅岑珈其真係做得到band3學生嘅氣質 ，而精英班嘅學生的確做到男女拔萃名校嘅氣質wor。

選角好緊要架！冇人拎槍指住你TVB一定要拍校園劇。咁有錢，唔該用眼睛去選角，屎眼for屙嘢咋！

強如呂布，都冇可能場場戰役親自帶兵上陣。縱使王晶嗰腦轉得異常地快，都無阻佢嘅失誤多多。加上賽馬耽誤咗王晶，若非掛住賭馬，王晶嘅成就絕不止於此。

我寧願佢開班教學，寫每一個劇本之前都搵親啲徒弟，王晶出橋同故事骨架，徒弟補返啲肉同血。可惜王晶全部資金嚟，劇本佢寫，又要導戲，又要應酬r贊助。可見佢根本應接不暇。

王晶嘅電影，通常都富有創意，雖偶爾會偷外國電影嘅綽頭嘢，總啲嚟講，佢寫嘅故多數都唔錯，但對白，堪稱咁多名導演當中，最廢嘅一個。

Cheap？市井？Hea？已不足以形容佢電影中嘅好多對白。

你聽歌會唔會唔care 歌詞？旋律好聽，歌手正，男人心一字馬你都無所謂？

對白喺一套電影入面，雖然不足以主宰電影。但對白處理得唔好，就好似食一碗好好味嘅粥，慢慢咀嚼先feel到有陣異味，唔知啲料壞咗波及碗粥定廚房佬唔乾淨。

如片中所言，王晶電影嘅對白之廢，食之無味，仲要同畫面唔協調，吹到銅鑼灣揸fit人點點點，點知好似小學雞咁講嘢，又例如話高科技，其實同國產凌凌漆嘅達聞西醫院。

咁多導演當中，王晶拍嘅電影，喺處理對白方面相當弱雞。素聞王晶係好老闆，從不拖糧，公道價錢。如果掛住刨馬，不如俾多啲機會等其他後生仔去寫對白同劇情，我相信點都好過佢自己攬上身，卻力有不逮。

我成日強調，「skip住嚟睇戲/劇」係無奈之舉。好似TVB班粉腸，一啖砂糖一啖屎，好耐未試過連續三套劇都唔垃圾。要佢哋中三重彩仲難過方逸華翻生。

「白色強人」呢啲劇集，十集俾多佢。佢硬係要拍夠25集。咁點算？劇情死砌爛砌，最常見嘅2打6嘅曖昧關係和愛情。差啲連洗廁所嘅阿姐嘅初戀都想講埋。以前佢哋套「不懂撒嬌的女人」，如果十二集內結束我覺得還可以，佢就要拍多十幾集。咁啲劇情唔暴走唔亂嚟都唔得啦。

冇貨賣呀嘛。

相反 「教束」有質素，頭幾集已經知佢猛料，佢有權拍夠20集（以40幾分鐘為一集），結果每一集得20分鐘左右，播咗四個禮拜就大結局。節奏爽，劇情連貫，每一集緊隨之後有高潮。

加上貼地呀嘛。

而VIU TV十點劇「退休女皇」，堪稱災難。同以往唔少VIUTV劇一樣咁怪，咁難睇。

睇嚟VIU TV想喺劇集上追近少少TVB 仲路漫漫 任重而道遠……

講起酷刑，電影「滿清十三酷刑」的確幾酷刑，不過都唔夠黃秋生嚟，黃秋生除咗識用筷子插人下體，仲識用口吸走人嘅眼球，堪稱單技當中嘅頂級高手。

喺電影「恐怖雞」內，吳倩蓮先後斬黎耀祥四肢再用膠紙封住。可以同黃秋生直接角逐單技嘅「最佳設計」。

而最令我發噩夢嘅酷刑，必屬「滿清禁宮秘史」入面，有個妃子得罪咗皇后，皇后搵人斬佢四肢再將佢塞入一個釀酒用嘅器皿內，日日都吊住佢命，玩殘佢。

當然「黑太陽731」，講日軍點樣搵中國人做實驗，建議大家就唔好睇。嚇到瀨尿。

而本片，屬於「組合酷刑」，而非單單一個酷刑。雖然「溫和」好多，但都觸目驚心。

組合酷刑

「嘩你阿哥韋家輝，你仲做2打6？」我相信呢類冷嘲熱諷，韋家雄肯定聽唔少。好多人以為做主角做重戲份嘅角色先叫威風，其實不然。能夠腳踏實地，唔靠關係和應酬，熱愛演戲，先係真正嘅型。

對於一個創作人、演藝人嚟講，名氣大有名氣大嘅好處，名氣細有名氣細嘅好處。劉德華夠唔夠薑單拖落7仔買condom？我就夠膽買condom即場拆開吹波仔。名氣大代表冇曬私隱，去到邊都俾人圍俾人問，其實好煩。加上大名氣一旦幾年冇作品or代表作，就會俾人寸過氣。

反而名氣細同冇名氣，更加可以投入創作當中。當然，每個人嘅取態不一，有人好enjoy講句嘢幾萬likes，出街俾人圍。

。

旺角監獄 #韋家雄

有時候劇本沙石太多，故事麻麻，真係要靠演員嘅領悟力同執行力去補救。港產經典電影「伊波拉病毒」，黃秋生同羅莽師傅共赴非洲拍攝。喺黃秋生n年前後嘅訪問，直指呢套戲嘅劇本垃圾。佢同羅莽師傅研究點樣做得好睇，於是就成就喺非洲草原經典嘅粗口對罵大戰。

N年後嘅網民甚為受落，認為黃秋生同羅莽嘅對手戲好正。

「仇老爺爺」頭幾集，的確令我卻步，可能我太執著喺故事上，我唔認為套嘢嘅故事精彩。

例如第一集，某啲對白好離地，盧海鵬受年輕人恩惠，竟然不接地氣當面笑人廢青，仲要不止一次。喺現實世界，再無理嘅老人家,恐怕都唔會咁「爆」。導演游學修想突出廢老嘅野蠻霸道，卻拿捏得唔好。

呢套劇，沙石唔少。但游學修此子演戲唔錯，同老戲骨盧海鵬能夠擦出火花

呢個化學作用，就如同「伊波拉病毒」入面黃秋生與羅莽咁，劇本同故事都麻麻，全靠演員之間擦出火花。

演員救返嗰劇本，周不時有，有啲戲其實好一般，全靠演員單天保至尊。

「仇老爺爺」部分情節，乃游學修嘅拿手好戲：喜劇。所以套戲的確能夠draw到觀眾嘅喜好。

最後講下盧海鵬，呢個演員真係冇得頂。早排喺viutv拍攝真人show，被網民負評如潮，話鵬哥唔好笑 又寸。

好演員 唔代表私底下都好相處，喜劇演員唔代表私底下愛搞笑。但回到演戲呢個位，盧海鵬真係大師級。

伊波拉病毒 黃秋生大戰羅莽

仇老爺爺

坊間對「綠野飛仙」嘅評價，一邊倒插令狐沖契弟人渣冇本心。站在維護女性權益同討好女讀者嘅立場上，我也好應該補上一刀,祗不過編劇對人物嘅設定似乎拿捏得唔好。喺飛仙湖上嘅至死不渝，對阿英呵護有加嘅男子漢令狐沖，為何回到凡間，喜歡嬌柔做作 貪慕虛榮嘅名妓不得止，甚至奪走雀仙梁小冰續命嘅靈丹？

變心都冇理由變得咁快,咁狠。呢度嘅故事鋪排冇交待得好好。男人好色大家都知，但男人可以去到咁狠毒，尤其是對愛過嘅 愛自己嘅女人 可以如此狠，實在難以理解，畢竟佢哋喺飛仙湖嘅海誓山盟，太擲地有聲。

其次，相愛有盲點,相處才明瞭。雀仙無法適應人類嘅生活，處處碰壁被嘲笑，令狐沖亦飽受壓力，畢竟已經是官人，去到邊都俾人笑自己嘅老婆拾下拾下，內心肯定不是滋味。

最後，雀仙被奪走靈丹，老公又被打死。雀仙非但沒有報復，還以德報怨救返老公。可惜老公繼續迷戀妓女。呢個時候，雀仙有機會離開凡間，只要殺死令狐沖，咁就可以返到飛仙湖。最後雀仙寧願變唔返人 又返唔到飛仙湖 都要保住令狐沖。

由此可見，令狐沖固然有人渣嘅一面，雀仙嘅溺愛和縱容，也為呢一段本來就唔平凡嘅關係更添淒慘嘅元素。

每一段關係，只有當事人才明白，相愛分手 結婚離婚 其實都是當事人嘅選擇，外人冇必要放大邊個賤男 邊個淫婦呢類字眼。

好似我咁 今生未曾同彭羚相愛過 如果我早出世20年 我有信心彭羚便是我老婆，但我愛佢 佢愛我 就一定會幸福過現在佢同林海峰嗎？相處成點，是否有默契，鬼知咩。

小時候睇「綠野飛仙」，原本100分嘅令狐沖即刻得返50分，甚為同情雀仙。長大後先發覺，好多嘢，並非一句「賤男」總結得到。

綠野飛仙