「新的影評不能盡信，因為打手太多。」其實呢句說話唔夠完善，因為某啲低成本製作冇錢請打手，就會俾網絡暴民惡意劣評，水洗都唔清。

「私人會所」嘅預告片嘩眾取寵講上床，啲麻甩仔入場以為有得睇露點，點知冇（可能我睇漏），啲床戲相對保守，點到即止。咁唔夠喉，梗係踩到你一棟都冇。

我最鍾意睇啲香港人惡意劣評嘅戲。掘下掘下，好多都唔算爛，仲幾有趣。

「私人會所」嗰故仔OK，揭露金融界嘅陰暗面，好多人炒股純粹跟風冇用嗰腦，贏就自我膨脹，輸就認為技術性調整，於是有人不惜做陪坐賺夠本錢再訓身。

「男人不可以窮」x「喜愛夜蒲」x「鴨王2」=私人會所

拍出黎卻遠勝以上三套。全賴故事寫得唔錯，劇本根基不俗。演員一般、剪接麻麻，呢啲都非戰之戰。我成日同人講，最緊要故仔得。故仔唔得，再華麗陣容都挽救唔到。

舉個例子，喺「鴨王2」入面，啲富豪郁啲就話幾十萬包條女一晚，最誇張係競投 成千萬包一條女一個月。我唔係話現實中冇，只不過「鴨王2」入面啲女真的冇啲星味，素人到我以為彌敦道隨手招攬的女⋯加上啲富豪嘅開價態度，好似肥貓落馬欄⋯智障爆燈

相反 「私人會所」班有錢人 自然好多。十萬就十萬 包夜 有啲會送名牌袋之類。有錢唔代表亂咁黎架嘛。

舉第二個例子 「男人不可窮」入面講嘅金融嘢好蜻蜓點水。即欲言卻止，衰過唔講。「私人會所」入面有大量金融術語，點炒點呃，詳盡講解。

舉第三個例子，「喜愛夜蒲」駛鬼劇本，求其搵啲靚仔靚女拍下kiss同上床。「私人會所 」入面嘅親熱鏡頭全部有鋪排有關聯，唔係「喜愛夜蒲」咁斷開一截截 好似我睇動物世界咁。

一個人識唔識拍戲，唔係重點，重點係你嗰製作團隊有冇Heart？「私人會所」有好多不足，但肯定不是爛片。

女主角係讀商科嘅大學生，誤信朋友炒股輸十幾萬積蓄，然後走去私竇做陪坐。同啲客人吹水唱K唔駛做，每晚五小時，每月五萬蚊。

喺私人會所入面，女主角邂逅男主角。男主角係善良的股票經紀，女主角開始請教佢，漸漸日久生情。

現實中冇童話，男主角有次輸好多錢。女主角卻全身而退。男主角發現女主角已經變成呃人專家，於是兩個人就開始越行越遠。

其實呢條感情線幾好。可以拍得再好少少，恩怨情仇拍得唔夠好。

我覺得「私人會所」比上肯定不足，比下綽綽有餘啦。再講，如今港產片時代，仲有幾多唔係靠打手 真係好嘅佳作？咪玩啦哥仔！

私人會所

白金升降機呀，冇返咁上下文采點作到呢啲名出嚟？白金升降機即係飛碟。以前啲歌詞，有味道好多。家陣「矛盾只因深愛著 含家鏟」呢啲歌都可以拎金曲金獎，以前「風繼續吹」都入唔到十大。你就知咩叫強中自有強中手，蜀中無大將廖化當先鋒。

星際鈍胎

作詞：林振強　作曲： 鮑比達 演出：陳潔靈

望　望　望　人在仰望　
要看我那嬌美狀
一身星光　像有千隻火箭碰撞
難怪動　動　動　人在哄動　各界要搶先讚頌
衝　衝　衝　衝　令太空星宿也震動震動

現我像乘坐白金升降機　直上頂尖地
在宇宙中踏著月星盡獻技　地球著迷跳起

亮　亮　亮　燃亮四面　
我已笑發光發電
閃　閃　閃　閃　令到黑暗失去信念
我就像在雲霧裡面　醉眼看四方八面
不需飛氈　便會飛　不需要接受訓練

現我像乘坐白金升降機　直上頂尖地
在宇宙中踏著月星盡獻技　地球著迷跳起

在宇宙中踏著月星盡獻技　地球著迷跳起

劇情就好荒謬，有啲太誇張太over，講一個索爆美少女俾有錢大公子睇中，見家長嘅時候大公子嘅老豆盤問佢是否處女，仲要排期帶佢佢驗明處女之身。有次少女同公子郊外玩樂遇到外星人，外星人污辱咗少女。少女自知不是黃花閨女嫁不入豪門，就想訓鐵路軌自殺，點知遇到同樣喺度想自殺嘅偵探。偵探決定幫少女，結果搵到證據證明少女同外星人有第三類接觸，一夜之間成為大明星……

套戲好直接話俾你聽，靚女大曬，就算有很多不足之處你會原諒，坦白講，如此索爆嘅鐘楚紅就算要你睇佢90分鐘屙屎，都顛倒眾生啦。更何況冇屙屎，仲有好多古靈精怪嘅戲碼。不過呢首歌同剪接好睇過成套嘢。

全片：http://www.haitum.com/movie/107-23983.html

鐘楚紅

武俠小說點同言情小說相提並論？但金庸嘅武俠小說有纏綿悱惻，瓊瑤嘅言情小說當中有武俠情懷。今次俾我捉到嘅呢條友，好似穿越時空，萬千少女都為之瘋狂。

靚仔本來已經冇得輸，仲要風度翩翩、浪漫情深。楊逍&紀曉芙 費雲帆&紫菱 本來就係兩個阿叔溝𡃁妹嘅經典愛情故仔。成熟男人散發嘅魅力，輕易俘虜少女芳心。

其實我並不喜歡瓊瑤劇，我男人嚟架嘛，佢啲對白太過煽情同誇張，骨痺打冷震；金庸劇我麻麻，主要因為好多男主角都on dog dog，對做正人君子嘅執著超乎常人理解範圍，太過無添加無雜質嘅男人，實在太地。加上金庸小說本身都好誇張，啲武功招式離地得好緊要。我寧願睇漫畫古惑仔打到流幾公噸血花都唔駛入院急救。

咁我唔係孤兒院出世，我屋企啲女性觀眾成日煲瓊瑤劇，男性觀眾就睇金庸，所以我被迫都睇唔少。如果有得揀，我想睇黃易同古龍多啲。

2001年吳啟華版倚天屠龍記，除咗楊逍，好多角色都做得好出色。

滅絕師太 惠英紅

成昆 劉家輝

張翠山 劉松仁

殷素素 米雪

金毛獅王 駱應鈞

白眉鷹王 谷峰

趙敏 黎姿

俞岱巖 李國麟

殷梨亭 莫家堯

以上呢幾位全部超班演出。張無忌吳啟華除咗樣老少少，其實都唔錯，周芷若佘詩曼就真係唔得，連宋青書曹永廉都唔差。

張兆輝版楊逍除咗情聖嘅一面，其運籌帷幄、文武全才嘅老江湖本色，的確令人印象深刻。

楊逍 #張兆輝

以前叫得model嘅，就真係model，唔係單靠樣貌同身材；正如以前叫得作者嘅，冇幾個專欄揸手冇幾個單位揸手，唔該你出返去先。啊，香港最精彩在於創新，一個單位可以分拆成幾個獨立單位租出去賺錢，冇model級數嘅女仔又可以包裝成寫真女神，阿豬阿狗開嗰page又可以變成文豪。

Janice Man嘅橫空出世，正正創立「𡃁模」嘅潮流，冇幾耐又出多個Angela Baby抗衡Janice Man嘅獨霸地位。來也匆匆 去也匆匆 長江後浪推前浪 周秀娜等後起之秀就開始用人間胸器衝擊兩大女神嘅地位。

奈何市場從來捧紅賺到錢嘅寵兒，從樣貌鬥到心口，而心口唔突出Janice Man同Angela Baby開始轉戰電影圈，由低做起。

震驚嘅係，Janice Man同Angela Baby今年先30歲，前者開始喺影壇磨煉出演技，後者喺大陸紅透半邊天仲嫁埋俾吸金天王黃曉明。

30歲，29+1咋，當年青春無敵嘅女神，如今已朝著實力派嘅道路進發。而我呢個30-3嘅廢青，依舊喺Facebook上打打字談談戲，莫談買單位，大吉利是死q咗 都唔知有冇冇錢買骨灰龕位。（苦笑）

內衣少女

「睇餸食飯， 睇錢開戲。」頭四個字形容邱禮濤，尾四個字形容王晶。相比起王晶嘅老豆王天林本來已是大導演人脈關係通曬入行冇難度，邱禮濤挨咗好多年，從攝影師撈到變導演。雖然出身截然唔同，大媽兩位都係天生食呢行飯嘅天才。好Smart好有急才，靈感話嚟就嚟，幾日拍一部戲？冇難度！唔同嘅係，王晶最擅長幫老細賺錢，邱禮濤最擅長幫老細慳錢，邱禮濤最犀利在於，明明資源極少，拍出嚟又唔差wor。

本來王晶同邱禮濤，都是難得嘅創作天才。可惜一部電影令王晶徹底變成賺錢神器。「赤裸羔羊」，王晶編劇，佢搵嚟拍女人拍得最靚嘅霍耀良執導，出動埋紅顏知己邱淑貞，故事前衛，王晶勁用心，結果票房過唔到一千萬。佢一定嬲到底片燒q埋都唔定，求其搵個靚女拍三級片都唔止八百萬票房啦。「赤裸羔羊」令王晶明白，喺香港搞創作嘥9氣啦，求其抄襲外國電影嘅橋段，搵啲靚女露下波西，票房一定唔差。於是，王晶就成為最搵錢嘅導演。創作？心情靚咪俾啲心機，心情唔靚，跑馬好過啦。

邱禮濤，冇咁好彩，冇咁多老細課重金俾佢開戲。佢拍嘅戲通常票房一般，但老細俾好少資源，佢都可以拍。以我對佢嘅觀察，佢拍五部通常會有一部佳作，其他四部爛爛哋。縱使爛，但不乏佢嘅創意和佢想帶出嘅信息。而佢啲佳作，無論過咗幾多年，都會被電影迷津津樂道。

邱禮濤有幾咁叻？蔗渣價錢，煮出燒鵝滋味。99年上映嘅「愛情夢幻號」，可謂邱禮濤嘅「代表作」。並非套嘢幾正，而是拍戲過程可謂經典。老細搵劉德華擔正，搵佢收幾錢片酬。恰逢劉德華最落魄 身無分文嘅時期，劉德華冇客氣，佢話一千萬，老細話ok。結果呢套戲95%嘅資源俾曬劉德華，得返5%資源，邱禮濤竟然可以拍到落去,票房甚至做低好多「勁敵」。

據劉德華口述，佢人生最後悔便是為了錢接拍呢套「愛護夢幻號」。佢冇諗過佢收咗一千萬片酬，竟然幾乎是成套戲嘅預算。佢上咗郵輪，見到得幾個演員，仲有唔到十個工作人員。冇臨時演員，拍啦呢兩個禮拜。

最搞笑，嗰郵輪並不不是老細嘅,呢個郵輪本身已經乘載其他旅客.喺呢個咁苛刻嘅地步，邱禮濤甚至動員其他旅客充當臨時演員，硬生生拍咗套戲嘅主要戲份！

可能因為劉德華太紅，呢套戲竟然都有八百萬票房。但有睇過呢套嘢嘅朋友，都唔會覺得套嘢垃圾，其實「愛情夢幻號」如一般愛情片般易入口。

咁嘅資源，都仲可以拍出唔錯嘅水平，邱禮濤真係屈到。

可憐1999年嘅好戲，如杜琪峰嘅「槍火」 僅僅得四百六十萬票房。林嶺東嘅「目露兇光」三百九十萬票房。葉偉信嘅「爆裂刑警」得兩百萬。許鞍華嘅「千言萬語」唔過一百萬。

邱禮濤套「愛情夢幻號」贏曬以上「勁敵」。甚至擊敗劉德華另一套主演嘅「龍在邊緣」，王晶編劇。不過單單99年一年，王晶嘅電影如散彈打鳥般湧出，高嘅票房千幾萬。唔高嘅都幾百萬票房。果然 賺錢神器也。

邱禮濤同王晶曾合作拍「伊波拉病毒」 亦搵梁朝偉拍「江湖大風暴」，兩大神人合作嘅電影，票房卻少得可憐。兩人亦鮮有再合作。

PS：此片為邱禮濤接受訪問淺談自己電影嘅風格，黃秋生不屑嘅表情令人笑爆嘴：「我唔知點解拍爛片呀，我搵錢咋。」

訪問全片：

邱禮濤

、

基哥，非一般嘅男人。曾經做過古惑仔，吸毒，後來接受福音戒毒後加入電影圈，慢慢成為紅人。

佢惡行惡相，做演員一流。識搞下gag吹下水，撈埋喜劇。

實則好多黑社會電影，佢都有份做策劃、度故、監製。佢以過來人嘅身份，製作好多電影去導人向善。比起嗰啲吹奏黑社會英雄主義嘅電影，基哥有良心好多。

咪以為基哥粗人一個，佢其實好有文采。出口成文，吟詩作對，填詞作曲拉二胡，做編劇做監製。

打打殺殺，就算做到大佬，難得冇落檯嘅一日？

但創作有價，就算有日離開呢個世界，其作品都會受到讚頌。

基哥參與嘅電影作品列表：

http://hkmdb.com/db/people/view.mhtml?id=9691&display_set=big5

李兆基 #黑獄斷腸歌 #黑獄斷腸歌2之無期徒刑

節奏係一種好奇妙嘅演繹技巧。無論搞音樂 寫文章 演戲 都需要節奏，起承轉合，一氣呵成，冇拖泥帶水嘅嫌疑。節奏拿捏得好，其演繹會有更多嘅加分。有啲人節奏拿捏得與眾不同，佢亦容易突圍而出，令人記得佢 認識佢 崇拜佢。

吳毅將喺節奏方面，做得相當出色。奸佢一定奸，佢可以爆到，放到，狂到，唔會令人覺得突兀。

尤其飾演啲黐線佬，並不是一面猙獰，兇狠就得。高手在於節奏控制得好。

可惜吳毅將拍唔到啲大製作，多年嚟都祗能在B級片同三級片之間徘徊，其節奏嘅掌控同演戲嘅理解，絕對不止于此。

追龍 #反黑 #黑獄斷腸歌#弱殺 #南洋十大邪術

…

「新聞睇有線，綜藝VIUTV，劇集睇無線。」如果HKTV未收皮嘅話，劇集皇帝便是HKTV。可惜。可惜。

無線啲劇唔係話彈無虛發必屬佳品，而係冇對手。財雄勢大，散彈打鳥，偶爾都有佳作嘅。反觀VIUTV呢三年出街嘅劇集，雷聲大雨點小，好評如潮冇佢份，好評寥寥都有嘅。

TVB一個愛回家系列，已經KO曬VIUTV全部劇集嘅總收視和好評。點呢？放棄？全力做綜藝天王？

VIUTV劇集嘅死因在於，拍攝嘅鏡頭好奇怪，有啲似劣質電視電影嘅feel，創意一定夠，只不過拍出嚟唔夠吸引。所以就算有啲題材好好，但唔多人讚好。反觀啲TVB平庸之作，網上亦有唔少觀眾推post討論。

不過，「教束」嘅出現，令我覺得VIUTV有啲反擊嘅潛質。「點五步」我冇睇過，聽好多人講幾好。「教束」嘅監製和導演，便是「點五步」嘅導演和編劇。

喺呢個時代，肯追直播睇劇集已經好有誠意。雖知道廣告太多，一集都唔知有冇40分鐘。平均挨1分鐘廣告先有2分鐘劇集睇。VIUTV呢套「教束」令我每晚都追睇，暫時嚟講都幾好睇。

同埋勾起我唔少讀書時期嘅回憶。例如幫同學抄功課寫情信賺錢，幫同學買零食賺錢，見到教師們玩政治分化於是會寫文章諷刺佢哋，見到弱勢嘅同學會幫下佢等等。

有一年中五，嗰MISS針對某啲學生，唔俾佢調座位，於是我寫信辱罵MISS玩政治兼無恥，冇諗到咁就俾人踢咗出校。

我亦冇諗到，十幾年後，應該話呢十幾年嚟，我一直都係為人打抱不平，哪裡有不公平，我就會出聲。可惜，我冇超人嘅能力和資本，卻負上唔少代價，包括我寫嘅小說唔會再有人睇，睇人只會話我扮中立 五毛 共匪 幫黑警。

好彩,俾網絡紅衛兵抄家之後 我隱姓埋名開嗰電影page，都draw到人睇嘅，所以秉承宗旨，有碗話碗。亦希望VIUTV可以摸索到更好嘅拍劇心得，抗衡TVB！

唐記包點嘅飯，被我評為「走投無路著草必備嘅恩物」，啲飯爛嘅，啲菜臭嘅，但肉類尚算入得口，20幾蚊，糧尾食一個禮拜勉強挨到。但學界好多飯盒供應商，唔知同人有冇檯底交易，整嘅午餐難食過唐記數倍，依然可以繼續入侵校園，糟質學生。

十幾年前，我中三，午餐訂飯食咗一個月已經唔再訂，無意中落小食店聽到好多苦主訴苦，啲同學仔寧願食小食都唔食樓上啲訂飯。我走去問小食店老闆娘，提議佢整飯盒，佢話佢冇呢啲牌唔做得。當年我的確唔知明up乜，於是多次寫信去意見箱，冇人理（好大機會已讀不回）之後喺作文度講飯盒，被MISS借題發揮話我搞事。

宜家好多人做飲食，眼入面得錢呢個字。快啦，成本價低啦，求其啦。唔駛俾感情同誠意嘅。有唔少餐廳嘅食物，要同廚房佬心情掛鉤，佢輸波輸馬，就將畢生嘅怨恨注入烹飪度，所以當我食完，唔嘔唔死得已經好好。講真40-50蚊，自我滅聲好過。

而學校班小朋友，食午餐訂飯，更加敢怒不敢言，有幾多個好似我咁黐線敢於同阿Sir MISS講？

十幾年後，我細妹都升上中一（我中三嘅時候佢得4歲），媽咪捉到佢零用錢駛得好快，細妹話佢午餐訂飯倒曬 實在太難食，唯有買小食。

細妹嘅舌頭並不靈敏，好普通嘅嘢佢都話好食，媽咪有時候煮啲「九車連環相撞汁」嘅排骨，難食到喊，佢都話幾好。一個舌頭都壞壞哋嘅小朋友，佢話學校嘅飯好難食，證明啲飯真係垃圾。

學界飯盒，有冇得普選+試味？到底啲hea做嘅供應商同包庇供應商嘅校方有冇反省過？

冇呀，直到「教束」都談及飯盒問題，我睇到有少少滾動，所以都出多一個post講下。

做飲食，學生會 ，定作者，從來都不應該高高在上，我哋要服務大眾，回饋社會，點可以唔同群眾站在一起？點可以當群眾係豬？

好多所謂嘅名人 作者 講貿易戰都講到幾咁栩栩如生，但從來冇人關心過學界嘅飯盒之禍。啲議員，更加算吧啦，學生哥冇選票，睬你有味。

VIUTV套「教束」，節奏爽快，題材不俗，最緊要有種使命感，透過創作教育大眾 喚醒大眾 鞭策大眾。

「新人皮燈籠」，齋睇戲名以為又拎肢解當綽頭，人肉做燈籠。其實呢套嘢根本唔關奇案事，講前世今生同人鬼情未了嘅故事。

前世，梁家輝幫張耀揚打工，梁家輝同邱淑貞相戀，有日梁家輝得罪張耀揚招惹殺身之禍，邱淑貞見到梁家輝慘死亦自刎殉情。

張耀揚係一個擁有邪術嘅術士。於是佢將邱淑貞嘅靈魂鎖喺燈籠度等佢冇得投胎，另外下咒俾梁家輝等佢十世都行衰運。

今世，梁家輝找回前世嘅記憶，開始拯救邱淑貞。

創意唔算強，故事尚算合格，係導演劉偉強拍得好，加上三位演員突出嘅性格同演出。

根據1993年嘅票房紀錄，「新人皮燈籠」嘅票房收入為$5,360,080.00。

呢一年由於「八仙飯店之人肉叉燒包」嘅成功，好多跟風電影亦以火箭嘅速度生產。1993年可以算係奇案電影嘅風火年代。

而大量可觀性高嘅三級片亦上映，取得好成績。

但觀眾並不愚蠢，睇厭了奇案電影，亦被某些粗製濫造嘅跟風作品嚇怕。所以94年開始奇案電影開始以墜機速度慘淡。觀眾唔受。

「新人皮燈籠」上映時間為 1993年11月28日-12月7日，正值觀眾睇厭低成本 奇案電影嘅時間，我相信唔少人睇戲名已經唔想入場。

於是一套好嘅電影，就咁被埋沒喺歷史長河當中，得不到佢應有嘅成就。

新人皮燈籠