相信自己嘅感覺，就係我睇電影嘅宗旨。部分人睇王家衛嘅電影可以睇到好感觸，長篇大論。但我唔睇，我連佢拍葉問都冇睇過。我連啲爛到喊嘅電影都可以睇幾次，但王家衛啲知名電影我竟然冇睇過。

一：我未上岸。我唔認為我有興趣有耐心去睇啲被譽為好藝術嘅電影。如果星期四六合彩頭獎有我份，我可能先會進入到王家衛嘅世界。

二：窮鬼幫襯低成本製作。有一種好自然嘅傾向，我唔鐘意追荷里活大製作，我鐘意發掘啲舊港產片嚟睇。

「天水圍的日與夜」，我就好鐘意睇，我鐘意佢自然，舒服。啲對白平凡不做作，故事平凡不做作。戲嘅最高境界，令人唔覺得睇緊戲，栩栩如生，就好似眼前發生嘅事情。

有啲劇集，明明做醫生，啲對白鬼死咁押韻咁出位，有咁chok得咁chok，做手術好似赤壁之戰咁出場。可能好多觀眾鐘意呢啲，醫院好悶，唔加嘢唔好睇。

相信自己嘅感覺，你冇錯，我冇錯，佢冇錯。正如我咁完全black list王家衛三個字，我冇錯。你話呢套「天水圍的日與夜」悶，你冇錯。

睇戲，唔駛理會其他人，相信自己嘅感覺。同埋有啲戲睇唔明，唔需要夾硬搵答案，可能個個導演都冇答案。

天水圍的日與夜